മലപ്പുറം: മാനുഷിക മൂല്യങ്ങള്‍ ചവിട്ടിമെതിക്ക പ്പെടുന്നിടത്ത് തുണയാകാന്‍ നിയമത്തിന് കഴിയണമെന്ന് എസ്.കെ.എസ്.എസ്.എഫ്. മലപ്പുറം ജില്ലാ കമ്മിറ്റി ദേശീയ മനുഷ്യാവകാശ ദിനത്തോടനുബന്ധിച്ച് തവനൂര്‍ വൃദ്ധസദനത്തില്‍ സംഘടിപ്പിച്ച സ്‌നേഹവിചാര സദസ്സ് അഭിപ്രായപ്പെട്ടു. ഏറ്റവും വലിയ ജനാധിപത്യ രാജ്യമായ ഇന്ത്യയില്‍ പോലും പോലീസും, സേനയും, ജനപ്രതിനിധികളും ഒത്തുകളിക്കുന്ന മനുഷ്യാവകാശ ലംഘനങ്ങള്‍ അരങ്ങേറുന്നു. ഇതിനെല്ലാം ഇരകളാകുന്നത് നിരപരാധികളാണ്. മനുഷ്യാവകാശവുമായി ബന്ധപ്പെട്ട് കോടതികളില്‍ കെട്ടിക്കിടക്കുന്ന കേസുകളില്‍ നടപടി പൂര്‍ത്തിയാക്കാന്‍ കാലതാമസം എടുക്കുന്നതില്‍ സംസ്ഥാന സര്‍ക്കാറുകള്‍ക്ക് പങ്കുണ്ടെന്ന കമ്മീഷന്റെ കണ്ടെത്തല്‍ ഗൗരവമാണ്.
എല്ലാ തരത്തിലുള്ള മനുഷ്യാവകാശ ലംഘനങ്ങളും ഓരേ കണ്ണ് കൊണ്ട് കാണാനും ഒരേ സ്വരത്തില്‍ പ്രതികരിക്കാനുമാവണം. പരിഷ്‌കാരത്തിന്റെ പേരില്‍ മാതാപിതാക്കളെ ഉപേക്ഷിക്കുന്ന പ്രവണതക്കെതിരെ ശക്തമായ നിയമം വേണം. ജനറല്‍ സെക്രട്ടറി. പി.എം. റഫീഖ് അഹ്മദ് ഉദ്ഘാടനം ചെയ്തു. അന്തേവാസികള്‍ക്ക് പ്രഭാത ഭക്ഷണമൊരുക്കി. ഏറെ നേരം അവരോടൊപ്പം പങ്കിട്ട പ്രതിനിധികള്‍ അനുഭവങ്ങള്‍ ചോദിച്ചറിഞ്ഞു. കലാ വിരുന്നും മധുര വിതരണവും നടന്നു. ശഹീര്‍ അന്‍വരി പുറങ്ങ് അദ്ധ്യക്ഷത വഹിച്ചു. റഫീഖ് ഫൈസി തെങ്ങില്‍, ടി. ഹസന്‍ ഫൈസി, റാഫി അയിങ്കലം, സിറാജുദ്ധീന്‍ ഹഖ് ഹുദവി, ആസിഫ് മാരാമുറ്റം സംബന്ധിച്ചു.
