കാസര്‍ഗോഡ്: കേരളത്തിലെ പ്രമുഖ ഗോളശാസ്ത്ര പണ്ഡിതനും വിദ്യാഭ്യാസ ചിന്തകനുമായ സി.എം അബ്ദുല്ല മൗലവിയുടെ ഗോളശാസ്ത്ര ലേഖനങ്ങളുടെ സമാഹാരം ഇന്ന് (21.12.2013 ശനിയാഴ്ച) പ്രകാശിതമാവുന്നു. സി.എം അബ്ദുല്ല മൗലവിയുടെ വേര്‍പാടിന്റെ നാലാം വാര്‍ഷികത്തോടനുബന്ധിച്ച് കാസര്‍ഗോഡ് മുന്‍സിപ്പല്‍ കോണ്‍ഫ്രന്‍സ് ഹാളില്‍ സംഘടിപ്പിക്കുന്ന മെമ്മോറിയല്‍ ലക്ചറിന്റെയും ദേശീയ വിദ്യാഭ്യാസ സെമിനാറിന്റെയും പ്രഥമ സെഷനില്‍ ദാറുല്‍ ഹുദാ ഇസ്ലാമിക് യൂനിവേഴ്‌സിറ്റി വൈസ് ചാന്‍സലര്‍ ഡോ. ബഹാഉദ്ധീന്‍ നദ്‌വി കൂരിയാട് പുസ്തകം പ്രകാശനം ചെയ്യും.
വിവിധ കാലങ്ങളിലായി സി.എം അബ്ദുല്ല മൗലവി തയ്യാറാക്കിയ ഗോളശാസ്ത്ര പഠനങ്ങളുടെ സമാഹാരമാണ് ക്യതി. മൂന്നു ഭാഗങ്ങളായി തിരിച്ച പുസ്തകത്തില്‍ ഖിബ്‌ലാ നിര്‍ണയം, തവുക്ക പ്രയോഗം, കാലം-ദിശ-സമയം എന്നിവയെ കുറിച്ച് സമഗ്രപഠനം, മാഗ്നറ്റിക് കോംപസിന്റെ ഉപയോഗം തുടങ്ങി ഇല്‍മുല്‍ ഫലകിന്റെ (ഗോളശാസ്ത്രം) വിവിധ വശങ്ങള്‍ കൈകാര്യം ചെയ്യുന്നു.
അറബിയിലും ഇംഗ്ലീഷിലുമായി ഇതിനകം അഞ്ചു ഗോളശാസ്ത്രരചനകള്‍ സി.എം അബ്ദുല്ല മൗലവിയുടെതായി പ്രസിദ്ധീകരിക്കപ്പെട്ടിട്ടുണ്ട്. മലയാളത്തില്‍ മാത്രം എഴുതപ്പെട്ട പഠനങ്ങളാണ് ഈ പുസ്തകത്തില്‍ ഉള്‍കൊള്ളിച്ചിരിക്കുന്നത്. എം.ഐ.സി ദാറുല്‍ ഇര്‍ശാദ് അക്കാദമി വിദ്യാര്‍ത്ഥി സംഘടനയുടെ പ്രസാധക വിഭാഗം ദിശ ബുക് സെല്ലാണ് പുസ്തകം പ്രസിദ്ധീകരിക്കന്നത്.
