SKSSF ട്രൈസനേറിയം; വരവേൽപ്പിനായ് കുറ്റിപ്പുറം ഒരുങ്ങുന്നു

കുറ്റിപ്പുറം: നിലപാടുകളുടെ കരുത്ത്, വ്യതിയാനങ്ങളുടെ തിരുത്ത് എന്ന സന്ദേശവുമായി ഒരു വർഷക്കാലം നടക്കാനിരിക്കുന്ന എസ് കെ എസ് എസ് എഫ് ട്രൈസനേറിയം പ്രഖ്യാപന മഹാസമ്മേളനത്തിന് കുറ്റിപ്പുറത്ത് വൻ ഒരുക്കങ്ങൾ. സംഘടനയുടെ മുപ്പതാം വാർഷികാഘോഷങ്ങൾക്ക് സമാരംഭം കുറിക്കുന്ന പരിപാടിയിലേക്കെത്തുന്ന ആയിരങ്ങളെ വരവേൽക്കാൻ കുറ്റിപ്പുറം ദേശീയ പാതയോരത്ത് വിശാലമായ നഗരി ഒരുങ്ങിക്കഴിഞ്ഞു. ഫെബ്രുവരി 20 ന് ബുധനാഴ്ച വൈകിട്ട് നാല് മണിക്ക് നടക്കുന്ന പരിപാടിയിൽ പ്രമുഖർ സംബന്ധിക്കും. സമ്മേളന നഗരിയിൽ തന്നെ നടക്കുന്ന അസർ നിസ്കാരത്തോടെ പരിപാടി ആരംഭിക്കും.

സംസ്ഥാനത്തിനകത്തും പുറത്തു നിന്നുമായി ആയിരക്കണക്കിന് പ്രവർത്തകരെ പങ്കെടുപ്പിക്കാൻ ജില്ലാ തല കൺവെൻഷനുകൾ പൂർത്തിയായി. സംഘടനയുടെ പുതിയ കർമപദ്ധതികളുടെ ഉദ്ഘാടനങ്ങളും പതിനേഴ് ഉപസമിതികൾ നടപ്പിലാക്കുന്ന വ്യത്യസ്ഥ പദ്ധതി പ്രഖ്യാപനവും പരിപാടിയിൽ നടക്കും. സമുഹത്തിൽ വളർന്നു വരുന്ന പുതു തലമുറയുടെ അഭിരുചിയനുസരിച്ച് ധാർമികതയിലൂന്നി പ്രവർത്തിക്കാവുന്ന വിപുലമായ സംഘടനാ ഘടനയാണ് ഇന്ന് എസ് കെ എസ് എസ് എഫിനുള്ളത്. അതിന് വേണ്ടി മത കലാലയങ്ങളിലും പൊതുവിദ്യാലയങ്ങളിലും പഠിക്കുന്ന വിദ്യാർത്ഥികൾക്ക് വേണ്ടി പ്രത്യേകം വിംഗുകൾ പ്രവർത്തിച്ചു വരുന്നുണ്ട്. പ്രീ സ്കൂൾ മുതൽ ഉന്നത വിദ്യഭ്യാസ രംഗം വരെയുള്ള വിവിധ പദ്ധതികളിലായി സംഘടനക്ക് കീഴിൽ നിരവധി വിദ്യാർത്ഥികൾ പഠന, പരിശീലനങ്ങൾ നടത്തി വരുന്നുണ്ട്. ആദർശ പ്രചാരണം, സന്നദ്ധ സേവനം, ആതുരസേവനം, പ്രസംഗ, രചനാ പരിശീലനങ്ങൾ, സൈബർ ഇടപെടലുകൾ, സാംസ്കാരിക മേഖലയിൽ ഇടപെടുന്ന മനീഷ, പ്രവാസി ക്ഷേമ പരിപാടികൾ, പുതിയ തലമുറയിലെ നേതൃമികവ് പരിശീലനത്തിന് വേണ്ടിയുള്ള ലീഡർ 2020 തുടങ്ങിയ വിവിധ മേഖലകളിലെ പദ്ധതികളുടെ തുടർ പരിപാടികൾ ആഘോഷ കാലയളിൽ പ്രവർത്തനമാരംഭിക്കും
- SKSSF STATE COMMITTEE