കാസര്‍കോട് : മുസ്ലിങ്ങളുടെ വോട്ടവകാശം റദ്ദാക്കണമെന്നാവശ്യപ്പെട്ട് ലേഖനം എഴുതിയ ജനതാപാര്‍ട്ടി നേതാവ് ഡോ. സുബ്രഹ്മണ്യ സ്വാമിയെ ജാമ്യമില്ലാവകുപ്പുകള്‍ ചേര്‍ത്ത് ഉടന്‍ അറസ്റ്റ് ചെയ്യണമെന്ന് എസ്.കെ.എസ്.എസ്.എഫ് കാസര്‍ഗോഡ് ജില്ലാആക്ടിംങ് പ്രസിഡണ്ട് താജുദ്ദീന്‍ ദാരിമി പടന്നയും ജനറല്‍ സെക്രട്ടറി റഷീദ് ബെളിഞ്ചവും സംയുക്തപ്രസ്താവനയില്‍ ആവശ്യപ്പെട്ടു. ഇസ്ലാമിക ഭീകരതയെ എങ്ങനെ തുടച്ചുമാറ്റാം എന്ന ശീര്‍ഷകത്തില്‍ ജൂലൈ 16 ന് ഡി.എന്‍.എ ദിനപത്രത്തിലെഴുതിയ ലേഖനത്തിലാണ് ന്യൂനപക്ഷ സമൂദയങ്ങള്‍ക്കിടയില്‍ അരക്ഷിതബോധവും ആശങ്കയും സൃഷ്ടിക്കുന്നരൂപത്തില്‍ പരാമര്‍ശം വന്നത്. ഇത് ഇന്ത്യയില്‍ വിഷംചീറ്റുന്ന പ്രസംഗങ്ങളും പ്രസ്താവനകളും നടത്തിയ തൊഗാടിയുടെ വാക്കിനേക്കാള്‍ കടുത്തതാണെന്നും ഇത്തരം പ്രസ്താവനകള്‍ ലോകരാജ്യങ്ങള്‍ക്കിടയില്‍ ഇന്ത്യയുടെ മതേതരത്വവും യശസ്സും കളങ്കപ്പെടുത്താനേ ഉപകരിക്കൂ എന്ന് നേതാക്കള്‍ കൂട്ടിച്ചേര്‍ത്തു.
